IB攻略：Math Studies、SL同HL點揀好？

IB數學分咗3個不同等級，分別係Math Studies，Math Standard Level（SL）同Math Higher Level（HL），但係點揀好？唔同等級係乜意思？對報大學有無影響呢？唔熟IB課程又頭痛緊嘅家長，今次呢篇文章一定幫到你。Math喺IB非常緊要，你係一定唔可以揀錯Level，大學有啲科目，如果你唔小心揀左Math Studies，就算你考45/45滿分IB ，可能都無得揀！<br/><br/>Math Studies喺IB嚟講，係最容易嘅等級。通常學生IGCSE考C級或以下，或者IBMYP考得麻麻，當上到IBDP （IB預科課程），學校就會逼你揀Math Studies。Math Studies唔係唔好，有兩份Paper， 兩份都可以用計數機，考試相對簡單，而且只要同學畀心機，攞個6或7唔難嘅。問題嚟喇，如果你立志要讀工程，或者經濟等大學本科，你會睇到全部都一定要最高等級嘅數學：Math HL。有啲大學例如倫敦大學，Imperial帝國倫敦大學，要求數學一定要6分或者以上。其實咁睇，揀Math HL係最穩陣，因為邊間大學都會OK。但係最慘係Math HL課程都幾深吓，就算有啲IB學生揀左HL，讀讀吓頂唔到，最後跌咗去SL都屢見不鮮。<br/><br/>讀唔到HL Math會唔會係世界末日呢，大學會唔會咩都揀唔到？答案就梗係唔會啦。首先，你要睇你之後想讀咩科，例如想讀Architecture建築嘅話，好多大學要求IB HL要讀Arts，或者物理，但係唔洗Math HL。另外，香港最出名嘅Business科，IBGM環球商業管理，都唔洗Math HL，IB總分要求就要42分或以上，絕對唔容易。醫科嘅要求呢，亦都唔係HL Math ， HL科目要求係化學或生物， IB預計分總分就要44/45分以上先可以有面試機會。基本上，如果唔係報工程，電腦或者經濟，Math SL其實係百搭嘅。<br/><br/>咁報咗Math Studies點算好呢？同學都唔使擔心，心理學，社會科學，哲學，政治同埋文學呢啲係無科目要求嘅。例如知名傳媒人魏綺珊曾入讀嘅華威大學，佢嘅政治科（Political Science）都係講緊38分IB為Cut Off，Math Studies唔好攞低過5就OK。同學未來想讀設計嘅，亦都可以唔使讀Math SL或HL。<br/><br/>所以，如果同學未揀科嘅，記住睇吓大學數學要求，唔好求奇揀。同學讀咗一年IB，如果想轉科嘅，例如讀咗Math Studies想上返去SL，記住開學問問老師有冇得轉，順便喺暑假做好準備，因為學校有可能畀份卷考你，睇你成績達唔達到標先決定，而且通常份卷比平時嗰啲難！皆因學校唔想麻煩到行政上嘅問題，多數都唔太願意幫你轉，所以家長預咗要三催四請學校㗎喇。<br/><br/>點解筆者會知？有冇成功例子？我哋補習社大約4年前暑假，就正正係收咗一個咁嘅學生，Math Studies考咗4， 不過佢媽咪一定要佢讀SL Math，因為佢要去美國讀Animation。同學都笑佢無可能上到SL，Studies Level 4即係啱啱合格，仲話要跳級！故事嘅結果當然係令人鼓舞嘅，最後佢喺學校個測驗考咗個6，學校批咗佢讀SL Math，最後喺IB大考，跳咗8級，考咗等級5，比笑佢嘅同學仲考得好！<br/><br/>Edward<br/>HKExcel IB Specialist共同創辦人，教育超過三千名IB學生<br/>拔萃男書院畢業生，英國高考取得5A成績<br/>曾獲邀到多間IB學校分享應試心得<br/>曾撰寫「IB攻略」在書展大賣