東網電視
更多新聞短片
【入樽25年】《Slam Dunk》經典籃球鞋回顧（設計圖片）
1/26
對於八十後嚟講，於1990年第42期《週刊少年Jump》開始連載的日本漫畫《Slam Dunk》港譯：《男兒當入樽》就係青春期時最熱血的籃球事，試問當年喺球場打波有邊個無幻想過自己係仙道、三井或者櫻木？到1993年10月16日《Slam Dunk》於日本以動畫形式首播，更加將呢個由井上雄彥所創作的籃球漫畫故事人氣推向頂點。多年來Fans除咗鍾意將漫畫人物主角同NBA球星「對號入座」之外，於漫畫及動畫登場過的籃球鞋亦係大家對《Slam Dunk》投入度大增的原因之一，因為全部都係喺現實世界有得賣（但買唔買到又另一回事），是次藉着動畫版《Slam Dunk》首播25周年，就同大家回顧到底《Slam Dunk》中出現過幾多經典籃球鞋。
Air Jordan 系列
《Slam Dunk》入面出現得最多的籃球鞋款未必一定係Air Jordan，因為ASICS及Converse出現的比率都同樣地高，但論話題性及受歡迎程度一定高過後兩者，當中湘北隊櫻木花道及流川楓兩位主角就先後着過Air Jordan 6 Infrared、Air Jordan 1 Bred及Air Jordan 5 Fire Red多人追捧就固之然，但其實《Slam Dunk》仲有出現過Air Jordan 4 White Cement、Air Jordan 12 Taxi及Air Jordan 8 Aqua你又知唔知？前兩對就曾經出現過流川楓腳上，而Air Jordan 8 Aqua就係武園高中小田龍政（櫻木花道於和光國中時期的同學）上過腳。
ASICS系列
受歡迎程度僅次於Air Jordan系列的ASICS系列籃球鞋，於故事中亦有多位好波之人着用不同型號，當中包括：湘北隊三井壽所穿的「金太陽」Fabre Japan TBF 707、山王工高隊澤北榮治的Fabre Point Getter TBF 712、翔陽隊藤真健司的Fabre Gel Foam TBF 736及陵南隊魚住純的Fabre Gel LX TBF 734等等，《Slam Dunk》作者井上雄彥更曾經於1995年為ASICS設計過一款High Time TBF555籃球鞋款，此鞋款更於同年Good Design Award中獲獎。
Converse CONS系列
比起Air Jordan及ASICS兩個品牌更早征戰籃球鞋界的Converse CONS系列，於《Slam Dunk》中佔上相當比重，例如好多籃球迷都鍾意的角色陵南隊仙道彰同湘北隊宮城良田都係着Conquest Mid作為戰鞋，而湘北隊「大猩猩」赤本剛憲則揀保護性極強的Pro Conquest High，襯返佢打中鋒位置的重量級身形。
倉海遺珠系列
除了上述3個品牌的籃球鞋款受到眾多《Slam Dunk》Fans收藏之外，故事其實亦出現過唔少倉海遺珠的90’s經典籃球鞋，好似牧紳一及清田信長兩位猛長所穿着的Reebok Pump D-Time、同樣係海南大附屬高中的神宗一郎腳上的Nike Ultra Flight High及湘北隊木暮公延的Nike Air Force 1等等，但最驚喜亦相信唔係好多人會記得嘅係經常被櫻木花道「搓下巴」的安西教練原來係着住adidas Originals Pro Model，相信係整個故事入面唯一出現過的「三間」鞋款。
整個《Slam Dunk》故事入面最為人熟悉的籃球鞋款一定係櫻木花道以30日元於波鞋店老闆「買」返嚟嘅Air Jordan 6 White Infrared。（互聯網）
Air Jordan 1 Bred分別於1994年、2001年、2009年、2011年、2013年及2016年六度復刻。
湘北隊主角流川楓所着戰鞋就係於1990年正式推出的Air Jordan 5 Fire Red。於2000年、2008年及2013年先後復刻推出，但細節位如鞋舌物料、鞋舌內標籤、中底用色、鞋跟標誌及鞋側「23」數字刺繡都略有不同。（互聯網）
效力武園高中的同學小田龍政亦曾經穿着Air Jordan 8 Aqua配色上場。此配色為1993年推出時3款元祖配色之一，於2007年及2015年都有復刻。（互聯網）
去年《Slam Dunk》亦與Molten聯名推出了紀念版籃球，包裝紙盒及籃球表面分別印有櫻木花道入樽及飛身救波一幕。（互聯網）
三井壽讀緊武石中學時期穿的是另一對ASICS All Japan TBF 551。（互聯網）
陵南隊仙道彰同湘北隊宮城良田都同樣有着過Converse CONS Conquest Mid出戰。（互聯網）
海南大附屬高中兩位猛長牧紳一及清田信長就同樣係以Reebok Pump D-Time作為戰鞋。（互聯網）
但相信好多人都未必知道安西教練原來係着adidas Originals Pro Model，亦極有可能係整個故事入面唯一出現過的「三間」鞋款。（互聯網）
於1991年正式推出的Air Jordan 6 Infrared，及後於2010年及2014年亦先後復刻推出。（互聯網）
Air Jordan 1 經典程度係連法國時裝品牌Saint Laurent 2015年春夏就試過直接搬字過紙，將Bred、Royal及Shadow三款配色運用到其SL/10H鞋款之上。 （互聯網）
除咗好多人都認識的Air Jordan 5 Fire Red之外，其實流川楓於富士丘國中時期亦曾經着過Air Jordan 4 White Cement。1989年第一次正式推出，之後於1999年、2012年及2016年都有復刻再出。（互聯網）
2014年，《Slam Dunk》與Jordan Brand聯名合作，推出了鞋身印有漫畫圖案的Air Jordan 6、Jordan Super.Fly 3，連鞋盒設計都沿用漫畫設計。（互聯網）
5位球員中有2位都着住ASICS籃球鞋，日本漫畫捧日本運動品牌都係好合情合理。（互聯網）
翔陽隊藤真健司所着的則是ASICS Fabre Gel Foam TBF 736。（互聯網）
湘北隊「大猩猩」赤本剛憲戰鞋則係保護性極強的Pro Conquest High。（互聯網）
同樣係海南大附屬高中的神宗一郎腳上的是Nike Ultra Flight High。（互聯網）
於故事中第二對戰鞋就係Air Jordan 1 Bred，由波鞋舖老闆送畀佢，黑×紅配色除咗係Michael Jordan所屬NBA球隊芝加哥公牛主色之外，亦係櫻木花道球隊湘北隊主色。（互聯網）
雖然櫻木花道戰鞋係Air Jordan 6同Air Jordan 1，但角色原形無論係髮型同打法都好明顯以洛文（Dennis Rodman）為靈感。（互聯網）
於1996年第27期《週刊少年Jump》連續結束，井上雄彥更特別繪畫流川楓配上於同年登場的Air Jordan 12 Taxi，證明井上雄彥的確係一位鞋頭，鞋款於2008年及2013年都有復刻推出。（互聯網）
同系列更有推出2款Print Tee及一款Cap帽。（互聯網）
「好想打籃球」嘅三井壽於湘北隊時就係着住「金太陽」Fabre Japan TBF 707。（互聯網）
《Slam Dunk》作者井上雄彥於1995年亦曾經為ASICS所設計的High Time TBF555籃球鞋款，更於同年Good Design Award中獲獎。（互聯網）
此外，宮城良田亦曾經着過Converse CONS ERX 100 High及AND 1 Tai Chi亮相。（互聯網）
湘北隊木暮公延所着的就是至今都係大熱鞋款的Nike Air Force 1。（互聯網）
