IB攻略:邊類型學生唔適合讀IB課程?

20181120
東網電視
更多新聞短片
原來以下呢3類學生都唔適合讀IB。(互聯網)
非常多家長都會問我哋,究竟我嘅仔女適唔適合讀IB課程?好驚轉錯。問得呢個問題嘅家長,我哋都知道一定係名校仔女,仲要成績唔錯添!例如女拔DGS,喇沙中學呢啲傳統名校,但係又未有得讀IB,因為其他名校例如St. Stephen's College、筆者母校男拔DBS,都行雙學制,DSE+IB,所以好多家長心大心細。
【英文差唔建議揀IB】
傳統學校上IB,通常最大問題係英文。先前我有篇講過HKDSE英文同IB有咩唔同(http://bit.ly/2OShP1r ),該文基本上詳細講咗英文科嘅分別。重點重申一次就係HKDSE英文考文法多,讀寫聽說;IB英文考分析,評論能力多。不過除咗英文科,IB最麻煩嘅係Essays,每個科目都有幾千字嘅功課,如果學生本身好憎英文,唔鍾意睇書,唔擅長寫Essays,筆者不建議讀IB。除非你預咗搵IB補習,喺轉校前補番個底,同埋學埋IB考試模式同技巧,咁可能同學可以快啲適應到。
【財政狀況不穩定】
如果學生諗住入IB學校,例如ESF英基、WIS、SIS、KGV等,學費你預至少10至12萬港元一年,講緊每個月都要進貢學校大約1萬港元。但係直資DSE學校,都係講緊幾千元一個月,所以財政狀況係非常緊要。我哋之前見過有啲學生 (唔講學校名),因為父母離婚,但係母親財政上出現咗問題,爭咗學校成幾個月學費,學生要自己出嚟打工,又要讀書考IB,真係非常辛苦。當然,最後我哋無收呢位學生補習學費,但係知道小朋友要咁辛苦,其實作為教育者都覺得心痛。所以,入IB學校一定要量力而為。
【無Discipline嘅學生】
學生讀到IB Diploma,基本每幾個禮拜就會有測驗,因為有Predicted Grade嘅制度。每個考試都係計分。如果學生本身係一個非常懶散嘅人,平時又無溫習嘅習慣,喺IB高度競爭嘅環境,如果無外力幫助,好容易輸畀其他學生一大截,因為IB 80-90%嘅學生都有補習。你諗吓,學校考試嘅題目永遠唔會喺課堂教,因為要留喺考試出,但係學校老師可能教得好慢,而且成日旅行,老師換嚟換去,考學校、學IB課程,好多時候都會出問題。我哋之前聽過某啲學校因為老師放假,換咗第二個老師,適逢考試周,點知老師出咗份考試卷係同學從來未學過嘅,最後學生考完之後,個個投訴,最終變咗不計分考試,你話係咪咁都得?所以無補習嘅IB學生,又無自律能力,一樣不建議讀IB。
Edward
HKExcel IB Specialist共同創辦人,教育超過三千名IB學生
拔萃男書院畢業生,英國高考取得5A成績
曾獲邀到多間IB學校分享應試心得
曾撰寫「IB攻略」在書展大賣