打吡大賽「鄭裕彤」「曾偉雄」齊為愛駒打氣

沙田馬場今(16日)舉行寶馬香港打吡大賽，馬場全日人頭湧湧非常墟冚，好多名人都嚟湊熱鬧撐朋友場順道幫朋友嘅馬仔打氣。卓妮望一望個馬匹出賽名單，見唔單止有曾偉雄，仲連鄭裕彤都有馬出賽？唔通佢地靜靜雞又做咗馬主？原來只係咁啱同名同姓啫，但無獨有偶，竟然仲被我地遇到同中國民航局局長同名嘅馬會大董李家祥，世事有時真係咁巧合。

經過一番求證，終於確定馬主曾偉雄並唔係警務處處長曾偉雄，而馬主鄭裕彤亦非新世界發展創辦人鄭裕彤，只係同名同姓啫。「精精彩彩」馬主曾偉雄及「金貴人」馬主鄭裕彤分別都喺最近拉過頭馬，其中馬主鄭裕彤一家仲係第一次養馬添，佢同爸爸鄭明亮、及弟弟鄭裕偉今日一齊現身馬場感受大賽氣氛，享受家庭樂。

馬會大董、前會計界立法會議員李家祥今日亦現身馬場，原來佢都有曾經被認錯做民航局局長李家祥嘅經驗。話說有次佢朋友喺北京機場見到有本雜誌做咗個李家祥嘅訪問，誤以為係佢嚟所以拎畀佢睇，後來至知此李家祥不同彼李家祥。

一向同馬航有合作嘅康泰董事總經理黃進達(Jason)今日亦有現身，Jason話暫時冇收到有客人怕坐馬航而要改行程嘅事，相信對公司長遠影響不大。而今日有隻「馬來之珍」出賽嘅香港中華總商會副會長陳幼南同太太陳張思敏、及爸爸陳偉南一齊為愛駒打氣，佢話爸爸50年前開始已經喺馬來西亞有生意，有唔少朋友喺嗰邊，不過相信馬航事件後機場安檢會更嚴密，唔擔心之後危險。