東網電視
更多新聞短片
（左）吳小姐及（右）黃小姐均對事件表示「好驚」。
近日屢傳有的士車窗離奇爆裂，碎片分分鐘會將乘客毀容，警方為破解這迷團，亦進行了真人測試，有關片段瘋傳後，引起各界關注。
吳小姐(幼稚園教師)：「好愕然！有聽講過，但未睇過條片。好驚喎！車窗玻璃突然係自己面前爆開，以後會加倍小心，亦都會叫家人留意多！」
黃小姐(文職)：「條片之前都有睇過，好驚訝﹗平時都有搭開的士，但盡量都唔會郁個玻璃。整爛咗要乘客賠好唔合理！因為玻璃窗係屬於的士，乘客只係開關。」
任文職的譚小姐：「呢條片之前睇過啦！我會加倍小心同防備，避免發生係自己身上。如果見到車窗開左，就唔會觸摸佢，叫司機幫手開門！」
李先生(的士司機)﹕「如果發生係我架車，我唔會追討個乘客，因為唔係乘客問題，不過以後乘客上落車我都會提醒佢地唔好郁個車窗。」
黃先生(的士司機)﹕「行內人都知道車窗玻璃有機會爆呢個問題好多年，幾年前我架車後座左邊乘客校玻璃窗時都爆過，個乘客肯賠錢，我就收咗佢四百蚊左右，無收多架。」
