網民熱話：拖篋男聲稱被老點　搵學校變行山

九龍坑山上驚現拖篋男！有網民拍到，在今日中午12時許，1名約20歲男子拖住1個大篋，孭住旅行袋，以皮鞋配老牛頹T的裝扮，在九龍坑山頂往大埔方向行走。期間有熱心行山客見拖篋男大汗淋漓，更向他送上樽裝水。

對於鄉郊地方出現拖篋客，網民嘖嘖稱奇。有網民笑稱，拖篋男打算食「大茶飯」，或者準備「埋屍」。另有人笑指，拖篋客可能在「走水貨」。亦有人懷疑拖篋客實為偷渡客。更有網民表示，若遇到同類事件，會先報警。

九龍坑山約440米高，行上山頂需時約4小時，落斜位多，比較熱門的西貢古道難度更高。行山客可在山頂眺望大埔、粉嶺甚至馬鞍山。

拖篋男行山之謎其後終被解開，有網民回應指，他當時在山上遇到該名拖篋男，拖篋男表示自己由山東來港求學，指他「乜都唔識諗住搵中學重讀，但唔知香港有復活節假，間間學校都唔開」。該男子又稱，在上水問路時，被村民「老點」令他走上條山路。