八卦男女：你瞞我瞞 情侶間大話連篇
20161211
東網電視
更多新聞短片
東網訪問發現，港男港女最討厭的謊言是伴侶約了異性吃飯，卻沒有說出來。
男士是愛說謊的動物，女士則是難以捉摸的生物。為顧及對方感受，情侶間「講大話」，似乎無可避免。東網記者訪問發現，港男港女最討厭的謊言是伴侶約了異性吃飯，卻沒有說出來。港女最常講的大話是「我冇嘢呀！」「我冇嬲呀！」「我就到㗎啦！」；港男則因想有私人空間而講大話，另一原因就是氹女友而編造謊言。
為與另一異性發展親密關係，而向現時的伴侶說謊，是港男港女最討厭的謊言。李先生指伴侶曾與異性親密接觸，對方只講成「冇咁親密」了事。有同樣遭遇的黃小姐指出，男友與異性吃飯，卻「扮晒嘢」與朋友吃飯，隻字不提為異性，直至有人「喺(facebook)相到TAG咗佢」，才辯稱是普通朋友。
黃小姐坦言，自己遲大到時，就會講大話，「我5分鐘就到㗎啦，轉過彎就到，足足遲咗1個鐘。」事實上，不少港女都表示會因為遲到，而向男友編作謊言，另一位曾經遲到的黃小姐表示，當時自己賴床，卻講大話稱已經出門口，避免造成尷尬局面。
情場如戰場，男生若不理解伴侶心底說話，隨時躺着也中槍。「我冇嘢呀，我冇嬲呀！」拍拖兩年的葉小姐指，上述說話都是想獲得伴侶的關心及寵愛，只要對方氹吓就無事，但男生往往不知自己「錯在哪裏」。拍拖近一年的方小姐則指，「講得出口就即係有嘢。除非好強調，先真係冇嘢，不過女人就係咁難捉摸㗎啦！」
港男大嘆無私人空間，為逃避伴侶的「緊箍咒」編作謊言。「我瞓咗啦」、「我忙緊呀」等大話，為的都是偷取空閒與朋友打機、看足球比賽等。聲稱自己甚少「講大話」的廖先生指，偶爾想約朋友踢波及看球賽，想有私人空間則說自己有事要忙。
如女生常問男生鍾愛她的原因，廖先生會稱讚，「女友係最靚，老咗都係咁靚，呢個世界冇其他女仔，只得妳一個。」另一位港男盧先生指，男生講大話，有時為氹女生，緩和雙方關係，想對方開心。
緣來如始配對專家Jacky Hung指出，謊言有黑白之分，白色謊言在兩性中屬「關係語言」，男士向女伴講大話，是想維繫雙方關係，並沒有惡意，「男人肯對女仔講大話，都係想關係唔好去到咁惡劣，如果有心機講大話，其實對女仔仲有情義。如果唔再講大話，可能對你都冇感情。」他指每個人都喜歡聽好說話，「講真話你聽，你可能接受唔到。」
Jacky又認為，女士的說謊能力更高，比男士更有組織及圓滿，「有時女仔講啲大話，男仔唔輕易拆穿，但男仔講大話，女仔好覺。」他最後奉勸一句，「都係坦誠相對啦﹗」
情侶間理應坦白，沒有隱瞞，但又要顧及對方感受，偶爾「善意」的謊言，港男港女應互相遷就，何必太執着呢。
---------------------------------
想聽歌？想睇MTV？想了解本地Indie Band資訊，快啲click入「聲大夾樂」專頁：http://on.cc/musicon