政Whats噏：DQ引爆分歧　本土派聯盟瀕瓦解

多名本土派及自決派立法會補選參選人，早前被選舉主任取消參選資格(DQ)，事件除咗再次暴露本土自決派與傳統泛民主派之間嘅分歧，亦引發成立僅僅半年嘅本土派地區組織「社區網絡聯盟(社網聯)」瀕臨瓦解。有人指今次本土派內訌，源於他們對下月嘅立法會補選及2019年區議會換屆選舉有不同睇法。不過，亦有人指內訌起因是與社網聯的年宵攤位籌款安排有關，質疑有人因財失義！

違法佔領行動(佔中)結束後，多個本土派地區組織應運而生，紛紛派人參加2015年區議會選舉，與建制派及傳統泛民抗衡，但由於勢孤力弱，缺乏資源，最後只有極少數本土派候選人勝出。為了迎戰明年區選，6個分別來自葵青、沙田、荃灣、屯門、天水圍及藍田的本土派地區組織，去年8月宣布結盟成立社網聯，希望可以互相扶持，分享資源，為未來補選或換屆選舉鋪路。

社網聯發言人劉頴匡，早前宣布參加立法會新界東補選，希望為該組織打響名堂，但由於社網聯內部對參加補選有不同意見，劉頴匡其後須辭任發言人職務，最終更被選舉主任DQ，達唔到原來嘅宣傳效果。到咗昨日(9日)，「荃灣社區網絡」同「葵青連結動力」先後宣布退出社網聯，社網聯公關黃丹晴更辭埋職。有消息指嚟緊會有更多組織同成員退出，令社網聯瀕臨瓦解。

有指今次「退聯潮」，係因為不同組織及成員對下月立法會補選嘅投票立場出現分歧。有人認為喺所有本土自決派參選人被DQ後，他們及其支持者應該全面杯葛選舉，唔應該「含淚」投票支持傳統泛民嘅候選人；亦有人認為應以大局為重，否則只會益咗建制派。至於另一說法係，傳統泛民已開始就明年區選進行協調，並透過佔中發起人戴耀廷接觸社網聯，希望本土派唔好同泛民參選人撞區，但部分本土派堅拒讓路。

不過，亦有消息指今次「退聯潮」嘅觸發點，係同社網聯喺旺角花墟年宵市場開設嘅年宵攤位有關。該攤位原定幫整個社網聯籌募經費，支持聯盟內各組織嘅地區工作，但劉頴匡近日突然喺社交網站宣布，將籌款目的改為補償佢早前已支付嘅選舉經費，以及資助佢就DQ事件提出嘅選舉呈請，令聯盟內其他組織見財化水。無論真正原因係乜，事件再次凸顯不論係民主派定本土派，想做到團結一致，槍口對外，睇怕要早啲瞓發個好夢先得。