政Whats噏：建制派失守　深水埗區會撤授權票

深水埗區議會建制派使用授權票問題嚴重，屢次改變投票結果，民主派議員動議取消授權票制度。區議會今午(26日)召開大會，喺12票贊成、11票反對下，成功取消授權票。深水埗區有11名民主派議員，關鍵一票就來自報稱獨立嘅甄啟榮，可謂開創先河！

民協區議員何啟明帶同一個寫有「議會杜蟲藥」嘅噴水壺，及寫上「杜絕懶蟲」嘅道具，代表要透過取消授權來杜絕「議會懶蟲」。成功取消授權票後，佢話今仗唔可以話係贏，只係增加建制派成本，將來大家都要坐定定。

甄啟榮就解釋，只係根據自己嘅原則投票，強調唔係撐邊一派喎。佢又提到，年初區議會主席張永森動議，廢除委員會主席每2年重選嘅一貫做法，「我警告過佢，咁會打開缺口」，過往只會喺換屆檢討會議常規，咁主席今年都改得，點解人哋唔改得？佢話既然用咗2年授權票，其餘2年咪試吓唔用囉。

另外，民建聯小花陳穎欣就翻民協舊帳，話當年民協主導區議會嗰陣，民協老將馮檢基都有用授權票，「嗰陣又唔見你哋(民協)要取消」，仲話民主黨立法會議員涂謹申同許智峯都有用喇。不過，何啟明又寸返佢，話睇番紀錄現屆區議會，民建聯立法會議員張國鈞用授權票先最多！

深水埗區民主派同建制派嘅比重相若，往往一票已經可以好大影響。喺今日投票前，大會曾休會幾分鐘，有指建制派盡最後努力去拉攏甄啟榮。從結果嚟睇，建制派失守，可能要追溯到張永森年頭開壞先例，今日就要集體食番個惡果嘞！