政Whats噏：吳文華圓夢　67歲取首個學位

立法會前秘書長吳文華(Pauline)係當年秘書處內，少數冇大學學位嘅職員，所以幾年前退休後，即報讀澳洲一間大學嘅組織管理(Organizational leadership)4年制遙距課程。現年67歲嘅佢，今年終於畢業正式取得人生中第一個學士學位，一圓戴四方帽心願，依家更喺兩所大學任客席教授添！

Pauline雖已退休數年，生活仍多姿多采，讀書之餘亦專注搞社企及長者資訊網上平台，算係「退而不休」。佢今日(14日)出席一個有關「黃金時代」培訓學院活動，所謂「黃金時代」即指45歲或以上人士，主辦單位希望透過提供學習同參與社會改變嘅機會，令呢一代人可以轉化為解決問題嘅創革者。

佢喺活動上，正好分享自己作為「黃金時代」，如何喺大學4年間，掌握過去40年工作生涯中得唔到嘅知識，而且又點樣將知識運用喺依家嘅工作上。正所謂「學海無涯」，只要有心同毅力，70歲讀書亦唔算遲，相信Pauline能夠圓夢必然好開心，更可以成為黃金時代嘅代表！