政Whats噏：林鄭玩網上直播　呃Like變吸嬲

行政長官林鄭月娥今(17日)晚喺社交平台Facebook搞直播，話想聽吓市民對施政報告嘅意見，不過短短約48分鐘嘅直播之後，喺4400個網民畀嘅表情符號之中，「嬲嬲」佔咗近3300個，「吸嬲」比率高達70%。唔少網民亦批評林鄭揀問題回應，避開難答嘅問題。<br/><br/>林鄭喺直播中答咗20幾條問題，部分問題聲稱係預早收集嘅網民意見，臨場再由主持人抽出。另一部分問題就係由主持人喺直播期間嘅留言中揀出。不過，網民就唔多滿意安排，其中社民連副主席黃浩銘就留言鬧林鄭「抽晒啲有利自己嘅問題，避答即時問題」，本土派劉頴匡亦話「成個live得佢講無網民講」。<br/><br/>至於獲抽中嘅網民，唔少都希望削減每日150個嘅內地單程證名額，林鄭就話「可能最近有人好成功咁同大家洗咗腦」，稱單位供應緊張及樓價高昂，與單程證無關，反指好激進嘅青年人，父母同其本人亦可能是透過單程證來港，話新移民不應受排斥。至於網民Charles Lam問「幾時炒陳帆魷魚」等嘅題目，就無被選中。