政Whats噏:葉劉傳空降屯門 博超區入場券

20180918
東網電視
更多新聞短片
葉劉盼參與區議會選舉,有傳已睇中屯門區,或接蘇炤成棒。(設計圖片)
立法會議員葉劉淑儀過去多屆都係循香港島地區直選進入議員,但佢上月明言下屆打算轉戰有「超級區議會」(超區)之稱嘅區議會(二)功能界別。但要攞到參選入場券,葉劉就必須喺下年舉行嘅區議會換屆選舉中取得議席,近日地區就傳出葉劉睇中屯門區。
葉劉過去三屆都出選港島區,今屆更以票后姿態勝出,而舊年中西區山頂選區有補選,葉劉亦曾公開表明有意參選,所以坊間普遍估計葉劉都會喺港島區落腳。不過,現時港島4個區議會嘅勢力分布已成定局,大部分建制派議席喺民建聯同工聯會手上,至於葉劉喺立法會選舉中得票最高嘅中西區山頂同南區海灣區則屬自由黨,該黨亦公開表明無意讓路,所以葉劉難有選區喺港島落腳囉!
近日地區就傳出,葉劉挑戰屯門區議會味道漸濃,因為早前區內一個私人住宅屋苑嘅交通問題,竟然勞煩到扎根港島區嘅葉劉遠赴屯門,親自跟進與居民接觸,令到唔少地區人士嘩然,估計有關動作同葉劉部署出選超區有關。
該私人屋苑貼近三聖選區,即新民黨蘇炤成嘅選區,而蘇炤成已連續參選10次區議會選舉並全部勝出,由1982年至今一共做咗36年,可謂非常資深,但同時年紀都有番咁上下,已接近80歲,所以有人估計蘇炤成會放棄連任明年區選,將選區交畀葉劉。
不過,葉劉落過去嘅私人屋苑,如無意外會撥入新選區掃管笏,同區有部分地方原本屬於蘇炤成嘅三聖選區,所以唔能夠排除葉劉係想同地區工作相當扎實嘅蘇炤成拍住上,兩個其中一個落戶新選區,實行為新民黨爭取多1席,始終新民黨現時只係比超區提名門檻15名民選區議員多4席。
對於空降屯門嘅傳言,葉劉就斬釘截鐵話無咁嘅決定,因為地點對佢嚟講太遠,只係應區議員要求去幫手,元朗、沙田等都去咁話,重申自己唔只去屯門幫手喇,至於區議會落區就仍然研究當中,未有任何決定喎。
葉劉密密部署選區議會選舉,鋪路轉戰超區,又將港島嘅出選機會讓畀黨內第二梯隊,以爭取增加1席至3席為目標。而該黨前副主席、雙料議員田北辰上年退黨,令到新民黨喺新界西直選由1變0,但有新民黨中人估計,該黨下屆立法會唔會派人落新西收復失地,因為下屆新西建制派嘅勢力與今屆分別不大,貿言派員參選可能分薄票源導致建制派損失議席,所以要放棄新西以避免新民黨成為箭靶咁話。