政Whats噏：趙麗娟追車致骨裂　堅拒打石膏

香港會計師公會前會長趙麗娟向來熱愛跳拉丁舞，但早前見一向身手敏捷嘅佢行路時一拐一拐，更要用拐杖出入，連身邊嘅友人都對佢特別關顧，唔通係練舞過度受傷？<br/><br/>佢就形容今次係無意義嘅受傷，全因早前喺內地着住高踭鞋追的士，右腳一拗就搞到骨裂，故以後都唔敢再追車喇！不過佢仍然樂觀，識得講笑話痊愈後左腳會非常有力，因為呢段時間靠晒左腳咁話。而醫生當初就建議佢打石膏，咁就可以4至6星期好番，但佢擔心打石膏對生活影響大而拒絕。<br/><br/>另外，佢喺骨裂初期時右腳非常腫脹，搞到造型甚為突出，因為左腳着波鞋、右腳着拖鞋囉！而現時稍為消腫，改着朋友介紹較為輕身且鞋面較闊嘅鞋，但由於仲要用護踝，令到左右腳尺寸仍有差異。為咗解決呢個問題，佢依家買鞋要買兩對同款但唔同尺寸嘅鞋，又幾有諗頭喎。