政Whats噏：白鴿黨反音樂噴泉　胡志偉遲到要靠邊站

涉款5000萬港元嘅觀塘海濱音樂噴泉雖然備受爭議，但有關項目準備喺立法會復會後直闖財務委員會以取得撥款。民主黨(白鴿黨)九龍東團隊今日(7日)就公布一項民意調查，話不足一成市民支持興建噴泉喎，而該黨主席、九龍東立法會議員兼黃大仙區議員嘅胡志偉卻遲到，無位坐要靠邊站之餘，仲差啲無得發言。話晒假假地都係黨內九東揸旗手，咁樣做好似唔太妥當喎！

團隊喺暑假期間進行街頭民意調查，分別喺觀塘、藍田、坪石、牛頭角收集民意，叫市民選擇想將5000萬港元用嚟改善醫療定係起噴泉，最終695位市民中，有93%人支持改善醫療。點解選項只得醫療？該黨觀塘區議員鄭景陽就話，區內人口老化同貧窮問題嚴重，參考過其他組織調查，發現多人重視醫療，所以個人覺得筆撥款可以做醫療。

該黨社區主任梁翊婷更稱，涉款17億港元嘅元朗市高架行人天橋，都係政府知民意不足要抽起，促政府收起埋噴泉，再做諮詢，否則會到立法會申訴部投訴。

胡志偉喺記者會開始約6分鐘先到場，眼見5位社區主任同鄭景陽都坐定定，自己連位都無，只好靠邊站。最後梁宣布活動完結時，胡主動上前攞咪先至有得發言。不過，胡全程都叫傳媒有咩就問社區主任，睇怕佢都係想畀啲細上位，只可惜班細唔識做，搞到觀感上冷落咗啊主席啫！