政Whats噏：楊何蓓茵寸何啟明無功課論　火花四濺

教育局常任秘書長楊何蓓茵今日(6日)早上與深水埗區議會議員會面，民協何啟明講起香港嘅教育制度只為考試，希望搞「無家課日」斷絕催谷心態等。楊何蓓茵就暗寸何啟明「好多人話香港嘅教育制度有問題，我覺得係濫用咗制度呢個字」，強調「教育局從來從來都不是話畀學生聽，話學校聽，話畀家長聽，入到大學係唯一嘅出路」。

何啟明話，中小學全部都為學生考好試，不斷谷成績，好多市民嘅心態係「入唔到大學就冇出路」，質問教育局有冇咩做法可以改變教育觀念嘅問題。

楊何蓓茵一聽完何啟明嘅說話就有火，即刻話「非常之歡迎何啟明呢個提問」，直指冇制度係完美，但亦唔可以話邊個制度有好大問題，明白社會要求增加大學學額，但當局亦提供職業專才教育等多元出路，亦希望做好家長教育，包括家長點睇，係咪子女讀大學先係唯一出路。佢又話，唔贊成機械式操練嘅家課，但外國有研究指，長假期完全冇家課，退步得較多嘅係經濟能力較低嘅學生，家課質比量重要等等。

楊何蓓茵以往曾經做過深水埗民政事務專員，資深區議員衞煥南特別趁佢走時打聲招呼，但衞記錯她係2000年做民政事務專員，她笑指「2000年我走啦」，話衞「冇心肝」 ，原來佢係1997年至2000年做專員，衞邀請對方去視察一間學校，她笑指擔心巡得一間就好多都要巡，「我成個月唔做嘢都搞唔掂喎」，強調負責嘅同事好清楚該校情況，諗緊方法點幫手咁話。