東網電視
更多新聞短片
黃樹堅覺得粵語一啲都唔俗，而係太古雅！
1/8
普遍人都會覺得，我哋平時溝通用嘅粵語用字太「口語」、「通俗」，好難入文。不過，有鑽研粵語字詞嘅拔萃男書院前老師黃樹堅就反駁呢個講法，「根本唔係粵語俗，而係太古雅！」喺研究粵語到底有幾古雅之前，我哋率先做咗個街訪，發現原來好多後生仔都唔識一啲粵語嘅正寫係啲咩。到底有咩粵語詞彙咁古雅？你又識得邊幾個？
啲粥好「杰」個「杰」字點寫？
答案係……「渴」！雖然呢個字依家係讀「渴（音喝）」，但喺古書入面，佢個音係「渠列切」，讀「杰（音傑）」，亦都同「竭（音揭）」字通用，意思即係水乾涸咁解。《左傳》記載，「山崩川竭，亡之徵也。」山塌陷同流水乾涸，係「亡」嘅象徵。所以，啲粥好「杰」，應該係用「渴」，表示啲粥入面冇咩水喇。
畀錢係「畀」定「俾」？
如果係話「畀」錢，呢個先係正寫。黃笑言「好古雅！唔好以為『給』係文雅，『畀』好俗，啱啱相反。」「畀」字早喺3000幾年前喺甲骨文上出現過，而根據《詩經》記載，「取彼譖人，投畀豺虎。」意思即係要搵啲專誣陷人嘅人，掟佢畀老虎！而「給」字，大概喺戰國時期先出現。
香港地好多人鍾意食炸雞「髀」，呢個寫法又啱唔啱？
東漢《說文解字》入面解作「股也」，唔係屁股，而係大髀。而喺當年「腿」字並未出現，而「髀」就有喇！
「水氹」真係咁寫？
依家我哋常用嘅「氹」字，喺清朝已經出現。不過，最原本嘅應該係「窞（氹音）」。《周易》坎卦入面有一句係「入於坎窞，凶」，坎係一個坑咁解，而喺《說文解字》，「窞」則係表示喺坑入面仲有一個坑，係兇險。「同我哋依家思維一樣，畀個窞人踩，人哋畀個窞你踩。」
粵語經常喺古文出現，一啲都唔「俗」！
要講呢啲例子，仲有千千萬萬個。講到點解依家嘅粵語好似係「俗」？黃樹堅就解釋，因為我哋長時間寫作要用語體文，「但呢個係北方人嘅語體，並唔係我哋嘅語體，我哋就寫做『我們』。我哋長期唔可以寫自己嘅語體，咪以為我哋係俗，唔通係雅咩。點知，我哋就真係太雅唔寫得！」
喺民初時期，胡適同陳獨秀等人提出「白話文運動」，自此「文言詞」就基本上唔可以喺語體文出現。「偏偏，我哋就有好多好古雅嘅詞，喺我哋把口度講出嚟。或者咁講，粵語保留咗好多文言文嘅字詞。」
復興粵語有幾重要？
有人話「方言係共同語嘅變體」，黃就覺得呢個理論雖然係啱，但係套用喺粵語同普通話嘅關係上就似乎唔太啱。「我哋嘅粵語雖然你可以話係變體，但係唔係今時今日嘅共同語嘅變體，而係古代共同語嘅變體。」佢再解釋，現今嘅普通話冇「入聲」，「但係我哋有喎，而且係同中古時代嘅入聲，喺某程度上係一模一樣，咁我哋係點樣由冇入聲嘅普通話變成有番入聲呢？」
黃強調，「既然普通話成為咗共同語成百年，咁咪繼續，我哋亦都係願意學普通話，但唔代表呢一種共同語巴閉晒，其他嗰啲就係廢嘅。」佢覺得，如果香港學生用普通話學中文，會令粵語「邁向滅亡」，更加會令粵語變成一種唔再有閱讀功能，淪為只得講嘢作用嘅語言，到時只會得番「粵音普通話」。「一種冇閱讀功能嘅語言，仲點傳承到文化？仲點填粵語流行曲嘅詞？」
「人，係平等，咁點解語言唔係？」
Elaine覺得天光太口語，唔可以寫落文章。（關萬亨攝）
啲粥好「杰」共實係「渴」，意思即係水乾涸，代表粥入面冇咩水。
如果香港學生繼續用普通話學中文，將來只會得番「粵音普通話」。
唔少人都會將「髀」、「畀」、「脾」同「俾」寫錯。
黃樹堅解釋，依家啲普通話冇「入聲」，但粵語就保留咗中古時代嘅「入聲」。
陳同學（右）笑住話唔識寫水「窞」個「窞」，話平時唔識嘅話會用英文拼音。
之所以要復興粵語，佢覺得係因為原本嘅粵語已經衰弱咗。
