政Whats噏:立會球賽議員Hea踢 陳沛然郭偉強救全家

20181209
東網電視
更多新聞短片
素來熱愛足球嘅陳沛然(左)踢得好落力。(溫國佳攝)
立法會足球隊尋日(8日)喺元朗踢咗場友誼賽,議員們雖然有落場,但有冇落力就值得商榷,事關好多人踢咗十幾廿分鐘就退場休息,齊齊坐喺旁述位置吹水,反而年紀最大嘅梁志祥就交足功課,踢得最耐。當中張國鈞最快離場,睇見佢只着長褲落場,又冇着釘鞋,個銀包仲喺褲袋未拎出嚟,似乎求其咗啲喎!
一問之下,原來佢之前半月板受傷,依家未完全康復,原本只係諗住嚟睇吓,但係按規定,開場時要有6名議員到場先會開賽,點知當時唔夠人,唯有頂硬上,象徵式踢咗幾分鐘。張嘅黨友劉國勳就遲大到,張爆料話劉尋日中午12點幾用短訊問佢借球鞋,但佢已出咗門,劉就話自己買,點知一買就買到4點幾,嚟到已經係後半場中段。更搞笑嘅係劉最尾都係冇買到鞋,而係借咗陸頌雄對鞋落場,踢咗兩腳就完場喇!
講起陸頌雄,佢喺球場上嘅表現都一般,不過佢就帶埋未夠10歲、踢緊U10嘅囝囝出場,個仔面對一大班大人完全唔怯場,一上場就迫到個角球返嚟,最後呢個角球仲要入埋,認真厲害!唔知陸下次再落場時,會唔會叫個仔教佢兩招先呢?
不過唔係個個議員都咁Hea,陳沛然就大部分時間都有落場,仲有一球進帳添!郭偉強喺下半場再出場都入咗一粒,結果立法會足球隊大勝5比3,成績睇落唔錯。但如果議員認真啲,或者可以更上一層樓,就唔會出現何俊賢生得咁高大,頂頭槌都輸畀人嘅尷尬場面喇!