政Whats噏:廚餘廠撥款重上工務小組 張宇人轟博懵

20190213
東網電視
更多新聞短片
環境局的廚餘廠撥款建議原裝重上工務小組,惹來張宇人的狠批。(設計圖片)
立法會工務小組委員會喺舊年年底審議北區沙嶺興建有機資源回收中心第二期嘅建議時,飲食界議員張宇人(Tommy)牽頭、建制派大黨民建聯(民記)助攻下拉倒項目,中止議案「發還重審」。不過,原來環境局喺本月初已悄悄地將項目重交工務小組,Tommy直斥當局處事囂張「原封不動就攞番上嚟」,若當局再帶佢遊花園勢再提中止,而民記亦冇法接受原方案上嚟。喺咁嘅情況下,若果環境局局長黃錦星繼續硬闖,睇嚟又會衰多鑊嘞!
喺舊年11月底嘅工務小組會議上,Tommy就工程建議連番提問,鬧爆工程費用昂貴,有錢都唔應該將公帑掉落鹹水海,最終委員會主席盧偉國決定劃線,Tommy即動議中止議程,獲得民主派支持同民記離席抗議,議案獲得通過。據悉事後黃錦星曾邀約部分建制派議員飯敍,但未包括Tommy同民記。
事隔兩個月環境局再向委員會遞交建議,主文件係零改動,但就加入大量補充資料解決議員提問。環境局政治助理區詠芷接受查詢時就話,建議已經擺低好耐,唔算快㗎喇,而且畀咗好多補充資料回應議員。至於會唔會擔心反彈大?佢就話開會咪知囉。而工務小組尋日開會,消息指前晚區詠芷曾致電部分建制派議員拉票,卻碰一鼻子灰。
舊年底有份拉隊離席嘅民記議員陳克勤話,政府起個廚餘廠淨係處理商業廚餘,但就推垃圾徵費收市民錢,做法唔公道,而當局既然乜都冇改,該黨就會繼續提問,惟局方要承擔之後可能發生「古靈精怪」嘢。
Tommy對當局做法更加係好勞氣,鬧爆環境局處事囂張、好夠膽、有少少病、博懵、離晒大譜,雖然唔係否決都唔應該原封不動提交文件,講明自己唔會被滅聲,「你聲大我都唔細」,如果局方再帶佢遊花園就繼續提中止咁話,強調錢唔係咁使。佢又透露,當局拉票竟然冇搵佢,但搵咗黨友航運交通界議員易志明,易就叫對方氹掂Tommy先。
黃錦星撞過一次板都未識驚,竟然連小小改動都冇,盧偉國又批准再提上會,已引起部分建制派耳語不滿。簡簡單單一個廚餘廠,只要局方做多啲、做好啲,議員又點會有咁多阻撓呢?黃錦星應該反省吓喇!