政Whats噏：國歌法委員會冧友　白鴿黨唔認轉軚

立法會已成立《國歌條例草案》委員會審議草案，截至上周三(13日)有60名議員報名加入委員會，兩大陣營「冧友」情況再現，而擁7個議席嘅民主黨(白鴿黨)卻只有4人參加，當時該黨政制事務發言人黃碧雲(一舊雲)更聲稱唔使「冧友」添，唔係邊有人做嘢。不過，委員會喺今日(17日)凌晨出最終名單顯示共有64名議員加入，白鴿黨更係全體議員加入，唔通怕被問責即刻「轉軚」？<br/><br/>根據文件，全體69名立法會議員只有5人未有參加委員會，包括立法會主席梁君彥、勞工界潘兆平、地產及建造界石禮謙、紡織及製衣界鍾國斌及醫學界陳沛然。一舊雲接受查詢時否認「轉軚」，話從來冇要求該黨全體議員加入，向來做法都是只要有代表即可。而突然「轉軚」加入嘅白鴿黨議員包括尹兆堅(肥尹)、林卓廷及鄺俊宇，肥尹強調一早已交表，黨團討論時都認為法案重要，大家會盡量加入，絕非受壓而「轉軚」喎。