政Whats噏：新大樓無期　港台申副廣播處長為常額位

香港電台(港台)嘅新大樓計劃完全冇施工時間表，落成之日遙遙無期，但港台今日(5日)向立法會提交文件，申請將副廣播處長(發展)編外職位轉為副廣播處長(行政及發展)常額職位，而該職位嘅主要職責之一，就係負責領導同統籌興建新大樓事宜，以及監督跟進審計報告建議嘅改善工作，該職位薪金加福利每年平均涉款超過364萬元。

多名立法會議員都質疑，依家仲未睇到改善港台嘅通盤計劃，新大樓工程更係有排都未展開，唔明點解要將呢個編外職位變常額職位。睇嚟廣播處長梁家榮如果唔能夠釋除議員疑慮，呢次開位分分鐘都會同之前新大樓申請撥款一樣觸礁收場喇！

港台幾年前申請建造價六十億元嘅新廣播大樓，但被立法會否決，其後與政府化驗所嘅聯用大樓計劃又終止，港台新大樓唔知幾時先有。不過港台向立法會提交文件，話現有嘅副廣播處長(發展)重點工作之一係規劃新廣播大樓計劃，立法會工務小組委員會嘅委員原則上大致支持興建新大樓，但對工程嘅預算成本及規模表示關注，港台依家同有意共用聯用大樓嘅決策局或部門及建築署商討，研究可行方案，不過副廣播處長(發展)職位5月就到期撤銷，所以就要申請將呢個職位轉做常額職位。

立法會資訊科技及廣播事務委員會主席葛珮帆話，審計報告早前批評港台收視低、教育電視節目製作費貴，認為與其開設多一個常額職位，不如摺埋教育電視，調動人手做其他工作，而且港台依家都未有通盤改善計劃，亦未有部門肯同港台一齊搞新大樓，所以暫時都睇唔到點解要開設呢個常額職位。佢仲話如果港台唔講清楚開設呢個常額職位可以帶嚟乜嘢成效，議員實大把嘢質問佢哋。

另一立法會議員何啟明都話，審計報告對港台提出多項批評，反問︰「即係做得唔好仲要申請增加資源？」佢又話，港台新大樓都未有着落，不如等新大樓工程真係開展到，先到立法會申請開設常額職位，否則一定好難得到議員支持。

另外，有立法會議員就爆料，話負責港台嘅商務及經濟發展局原本準備今年年中拍賣5G(第五代流動通訊)頻譜，有議員曾問當局相關修例建議幾時提交至立法會，點知當局冇回覆，反而只講港台開位好重要，議員直斥離晒大譜。商經局同梁家榮都要諗下點解畫至得喇。