政Whats噏：揀沈祖堯棄李國章　陳家亮鍾意兜彎路

試問有邊一個人唔想自己人生一帆風順？原來真係有！香港中文大學醫學院院長陳家亮今日(8日)出席活動時就話自己鍾意走彎路，大爆自己當年喺中大讀醫要揀專科老師嘅時候，時任外科系主任、現任香港大學校委會主席李國章就曾向佢招手，李當年係一個「好碼頭」，唔少學生都爭住「泊埋去」，不過陳就反而揀咗前中大校長沈祖堯，仲話沈當時只係畢業就醫兩年左右，可謂部門中最冇實力、最冇權冇勢嘅醫生！

咁點解陳都仲要跟沈？陳解釋係因沈年輕、有遠見，可以同佢一齊「闖天下」係好開心嘅事，仲話成功唔需要靠「泊碼頭」，所以需要揀一個有眼光之餘，也有空間畀佢發揮實力嘅老師。

查實陳唔係讀醫先開始行彎路，佢話自己由細到大都唔會行康莊大道，事關小時候家貧，曾經考到小學名校，但為咗慳番啲交通費就揀咗屋企附近嘅學校；考大學時，歷史悠久嘅港大醫學院都有收佢，不過佢就揀咗去新開醫學院嘅中大做「開荒牛」，所以早就習慣兜路，形容自己係「輸喺起跑線」嘅成功例子咁話。