你要知:磨刀唔使用碗底 簡單幾招「煉成」磨刀大法

20190323
東網電視
更多新聞短片
快速學識磨石大法,再鋒利的刀都不怕變鈍。
刀鋒變鈍,相信是不少家庭主婦的煩惱,當刀鋒不再鋒利,如何令它重拾高峰?東網找來「磨刀達人」鄒俊豪(Kenneth)傳授秘技,教你幾個步驟磨出一把好刀,再鋒利的刀,都唔驚再有變鈍一日。
磨刀前先將磨刀石浸水
要磨刀,點少得一塊磨刀石。Kenneth表示,在磨刀前先將磨石刀托起,以免太大動作令手臂撞到枱面。而一般在街市買的礦砂磨石,30港元內有交易。磨刀第一步驟要將磨刀石浸水,令其濕透,提升潤滑作用,以及控制摩擦溫度,「舊石係乾,刀又係乾,不斷摩擦就會發熱,太熱會令把刀唔好,水可以令把刀降溫。」
跟足呢幾個步驟 利刀可磨成
將刀放上磨刀石時,要呈45度角斜,一手拿刀,另一隻手則按着刀鋒位置,「推出用力,推返嚟就唔用力,如此類推。」至於如何掌握時間?由於每把刀磨損程度各有不同,不能一概而論,磨多久只能靠「感覺」。「當你磨到咁上下,摸吓刀鋒有冇刮手,有就代表磨好咗,然後反轉另一邊重複同一動作。」直至將刀鋒兩邊都磨至刮手,呈V型,便算磨好。
幾耐磨一次刀?
多久磨一次刀,要視乎刀本身的價值,貴價刀鋼水較好,硬度高相對襟用。一般家庭用的刀可能較平價,通常用一個月便需要磨刀,不過亦要視乎如何用刀。「如果你把刀成日用嚟斬骨,有劈嘅動作,損耗自然大,又或者把刀成日切生嘢,血水會侵蝕把刀,亦會加快刀嘅磨蝕。」
刀又如何保養?
Kenneth認為一般不銹鋼刀沒有一個特定保養方法,但如果長期濕水又唔抹乾,同樣會出現生銹,「切完最好用清水加洗潔精洗乾淨把刀,再擺上刀架,放喺空曠陰涼地方風乾。」放刀時切忌刀疊刀,以防互相碰撞甚至撞崩。而刀本身都有它的壽命,一般中價刀,在正確使用下5至7年是沒有問題,如果鋼水夠靚,甚至可以用成世。
普遍人磨刀的謬誤
坊間磨刀產品不少,例如磨刀棒及磨刀器,不過Kenneth認為最有效莫過於最傳統的磨刀石。因為磨刀石能夠削走刀面物料,相反磨刀棒及磨刀器則只能壓直刀刃。坊間有人會用砂紙磨刀,不過Kenneth認為成效有限:「砂紙其實好薄,用磨刀石基本都要磨15分鐘,但用砂紙磨10幾下,把刀未磨利,砂紙已經穿埋。」亦有人會用碗底磨刀,「一把平滑嘅刀用碗底磨完係會粗嚡咗,不過只係令把刀鋒表面形成凹凸,好似鋸齒狀咁,唔係真正鋒利。」