政Whats噏：政府派$4000　許德亮指填表60%為新移民

政府早前透過關愛共享計劃派發4000港元派到立立亂，搞到唔少市民都要搵議員幫手。油尖旺區議員許德亮今日(23日)話，佢幫手填咗600幾份表格，發現有400幾份係來自新移民，直言冇諗過當區有咁多新移民。許話，其實新移民對香港情況唔清唔楚，唔單止係制度問題，好多生活文化都唔識，建議政府畀內地人來港前，搞啲適應班畀佢哋熟習咗先。

許透露，有一個案係新移民喺街市買餸後，投訴檔主呃秤，點知佢一睇就發現只係香港嘅量重計法同內地唔同，係一場文化差異引起嘅誤會。他仲話兩地生活文化都好唔同，例如港人常用嘅通訊軟件、搜尋軟件，內地人可能完全冇聽過；而馬路問題就更加嚴重，事關車輛嘅行使方向唔同，有時內地人會望咗相反方向，搞到旺角經常都有內地人發生交通意外，所以若有適應班畀新移民，咁就有助減少各種文化差異造成嘅問題喇。