政Whats噏：莫錦貴擊敗林奕權　升呢做鄉議局副主席

鄉議局今日(1日)換屆，由大埔約、元朗約、南約各有一名代表出任主席同2名副主席，當中2個副主席位都有競爭，以大埔約較為激烈，因為以前代表大埔約嘅前鄉議局副主席張學明已退下火線，導致有3名鄉事委員會主席參選爭位，包括大埔林奕權、沙田莫錦貴，同西貢北李耀斌，最終由莫錦貴以58票勝出，取代張學明成為新一屆副主席。

其實張學明早前將大埔鄉委會交棒畀林奕權後，一直都有聲音指，佢係想連副主席一職都交畀林，事實上林亦取得57票佳績，換言之，莫錦貴僅以1票之差險勝。至於最後一名參選人李耀斌就只得21票。

莫接受查詢時表示，選前對自己都有信心，但冇諗過競爭會咁激烈，不過結果係點其實冇乜所謂，形容大家都係「自己人」，都係幫新界人做事，最終贏到當然感覺高興，嚟緊都會繼續跟進新界人關注嘅範疇，為新界人發聲。

另一名副主席係由南約代表出任，係由角逐連任、用新界太平紳士身份參選嘅林偉強同梅窩鄉委會主席黃文漢之爭，結果林獲77票，擊敗得60票嘅黃，成功連任。