政Whats噏:湯家驊倡設委員會商特赦名單 陳曼琪批奪政府管治權

2019年08月17日 16:06
東網電視
更多新聞短片
湯家驊(左)建議成立委員會,遭陳曼琪(右)狠斥其建議不公義。

反對修訂《逃犯條例》嘅行動愈演愈烈,行政會議成員湯家驊今(17日)出席電台節目時建議成立「真相與和解委員會」,委員會可向特首建議特赦名單。香港中小型律師行協會創會會長陳曼琪狠斥湯家驊嘅建議不公義,唔單止將香港法律制度連根拔起,根本就係爭奪政府嘅管治權。

湯家驊指出,雖然政府有權立法禁止市民喺重要地方集會,但政府要先宣布香港進入緊急狀況,咁做距離中央介入只係一步之遙,而佢創立嘅民主思路參考咗海外經驗,建議成立「真相與和解委員會」,有別於坊間爭取嘅獨立調查委員會,目的係要令社會復元,而唔係懲處任何人,委員會亦可以向特首建議特赦名單。

陳曼琪指出,2014年違法佔領行動至今,有部分人仍未被起訴,已向社會發放錯誤訊息,令部份犯咗法嘅人可以逃避法律責任,而湯家驊倡設嘅委員會冇法理基礎,更加係一個政治性嘅委員會,若可提出特赦名單,即係取代律政司嘅檢控職能,唔單止係衝擊政府管治,根本係爭奪政府嘅管治權。佢直斥湯提出嘅建議唔公義,違背法律面前人人平等嘅原則,強調現時必須盡早停止暴亂,盡快檢控犯法嘅人同交由法庭審理。

時事評論員陳雲生狠斥湯作為資深大律師,唔應該提出呢種不負責任嘅言論,建議只會添煩添亂,委員會可提出特赦名單根本係越俎代庖,令現時參與遊行嘅年輕人有不必要嘅期望,以為毋須承擔法律責任,更加有恃無恐,做出更激烈嘅行動。佢指中央政府多次表明現時反修例行動已演變成類似恐怖活動,若日後真係變成恐怖活動,亦非特區政府所能處理,因此若該委員會提出特赦名單,而特區政府最終做唔到,等如令政府失去誠信。