政Whats噏:財會議程大塞車 料民生項目優先處理

20191009
東網電視
更多新聞短片
財會將於後日重開,選出新一屆正與副主席。
立法會大樓喺呢4個月嘅示威浪潮中屢成衝擊目標,更加喺七一遭到攻陷而變得千瘡百孔,立法會逼住提早放暑假,本身已經大塞車嘅財務委員會(財會)壓力亦更大!不過暑假眨眼就過,財會將於後日(11日)重開,點樣編排議程就成為紓緩塞車方法,有部分議程更要讓路喇!
喺上個立法年度,立法會工務小組委員會交咗逾1400億港元嘅項目畀財會審批,但財會只處理咗唔夠一半,當中不乏與民生相關嘅項目。而財會積落44項撥款項目過暑假,據聞政務司司長張建宗同財政司司長陳茂波曾經喺7月搵財會主席陳健波(波哥)同副主席陳振英商討點樣加快處理,但當時不歡而散,所以財會取消會議,過埋暑假先再算。
現時暑假已到尾聲,財會後日就率先開會選出新一任嘅正、副主席,似乎開工清理積壓項目有望,不過當局如何安排議程都係一門學問,因為持續咗4個月嘅示威浪潮未見冷卻,更因為上星期政府宣布實施《禁止蒙面規例》而火上加油,如果一埋位就處理具爭議項目,分分鐘令到啱啱完成復修嘅立法會大樓再度重創,聽聞政府主力先推惠民政策,希望民生項目優先,面對嘅阻力都較細囉。
據了解,已過工務小組嘅民生項目會優先處理,即涉款160億港元嘅T2主幹路及茶果嶺隧道工程、24億港元嘅橫洲公屋計劃工地基建、逾100億港元嘅葵涌醫院及威爾斯醫院等重建或擴建工程等,至於公務員撥款就唔會放得太前,以免畀人覺得公務員優先過民生。
其實早喺6月已經有泛民對公務員加薪項目有動作,當時希望暫緩實施警隊加薪,所以復會不久就處理呢個項目確有可能添煩添亂,難為公務員團隊要再等多陣先加人工,不過項目追溯到今年4月,公務員嘅人工唔會少收,只會遲收。
波哥就話,後日會議順利選出主席後,先會知道政府嘅議程安排,但佢話按現時氣氛,估計選主席過程唔會順利,但若然順利當選,佢就傾向盡快加會處理塞車項目,因為目前有涉及約700億港元嘅項目,影響住30多萬名建造業從業員生計。