東網電視
更多新聞短片
馬逢國(左二)途經海富天橋，防暴警員唔認得佢，一度截住唔放行。(李志湧攝)
有網民呼籲今日(3日)下午1時到添馬公園聚集，警方隨即封鎖添馬公園嘅範圍同埋通往立法會大樓嘅海富天橋，期間立法會體育、演藝、文化及出版界議員馬逢國喺下晝兩點十五分左右途經海富天橋，但防暴警員唔認得佢，截住唔放行，及後一名總督察上前問發生乜嘢事，同時認到馬逢國，隨即放行，畀佢返立法會。
我哋問過馬逢國，佢話唔知道有網民呼籲喺添馬公園聚集，自己就要返立法會做嘢，點知行經海富天橋就被警員截住，當時警員問佢有冇需要一定要返立法會，佢話要，所以就畀佢過。
問到防暴警員係咪唔認得佢？佢就話冇可能個個議員都認得，呢啲好平常啫！再問佢禮拜日冇會開都返立法會？佢話由於今日有幾個活動要出席，兼且都喺立法會附近舉行，所以佢咪返立法會囉，佢又話好多時禮拜日都返立法會做嘢㗎喇！
