政Whats噏：選舉失利　梁美芬梁志祥陳恒鑌交棒失敗

今屆區議會選舉結果塵埃落定，受近月社會運動影響，建制派喺今屆區議會選舉慘敗收場，有部分長勝將軍亦遭受牽連，其中貴為雙料議員嘅民建聯梁志祥、陳恒鑌同埋經民聯梁美芬仲直頭交棒失敗，其中有部分仲輸成千票添！今次選舉重創成咁，建制派真係要好好反省喇！

今屆立法會議員當中，有成26位雙料議員，其中梁志祥、陳恒鑌、梁美芬、自由黨邵家輝、民主黨胡志偉同埋民主派區諾軒喺今次選舉中決定收山唔玩，交棒畀年輕一代。

今次交棒失敗嘅梁志祥、陳恒鑌同埋梁美芬，分別喺元朗天耀選區、荃灣楊屋道選區、同埋九龍城黃埔東選區做咗超過3屆區議員。不過今屆3位決定退下火線，交棒畀自己嘅黨友司徒駿軒、伍俊瑜同李超宇，但可惜3位都係落敗收場，其中司徒駿軒同李超宇同對手仲要差成過千票添！

另邊廂，邵家輝、胡志偉同區諾軒就成功交棒，接棒嘅分別係自由黨阮建中、民主黨莫嘉嫻同埋陳欣兒。其中莫嘉嫻過去曾經係九龍城區議員，但喺上屆輸咗議席，最後仲辭任民協黨主席一職，喺前年加入民主黨後仲轉埋區，今次成功重返議會。唔止雙料議員，就連區議員都交到棒，好似現任南區區議員柴文瀚咁，就成功交棒畀黨友嚴駿豪。

區議會選舉一向都出現唔少父子兵、兄弟幫同埋夫妻檔，本身係十八鄉鄉事委員會主席嘅梁福元，因為放棄連任而冇咗元朗區議會當然委員嘅資格，但最後又透過補選重返區議會。之不過，佢同囝囝梁明堅分別喺元朗十八鄉西同十八鄉中選區雙雙落敗，齊齊冇得撈。

另外，仲有兩對父子兵交棒，但都雙雙失敗收場，分別係灣仔跑馬地選區做咗廿幾年嘅吳錦津，今屆本身想交棒畀囝囝吳澤森，但最終以近150票之差落敗。另一對父子兵就係沙田錦濤選區嘅陳國強，今屆就由囝囝陳天俊出戰，最終都係落敗而回。

至於兄弟幫方面，大埔區議員區鎮樺成功連任，而佢細佬區鎮濠過去曾喺大埔大元選區出戰，喺今屆仲成功當選，齊齊做區議員。不過，分別喺九龍城黃埔東選區同埋紅磡選區出戰嘅關氏兄弟就冇咁好彩，哥哥關家倫就贏逾千票當選，但弟弟關兆倫就輸200幾票喇！

最後就仲有夫妻檔，深水埗區議員吳美成功連任，而老公麥偉明轉戰深水埗寶麗選區後亦成功當選做區議員；大埔區議員劉勇威今屆亦成功連任，老婆陳蔚嘉就出戰大埔太和選區，成功擊敗自九十年代起出任區議員嘅鄭俊和。