政Whats噏：鍾國斌試戴新口罩　話比外科口罩焗

受新冠肺炎疫情影響，全港依家一罩難求，除咗有政黨四圍撲口罩之外，紡織及製衣界議員鍾國斌(Felix)仲直頭同大學合作研發可重用嘅口罩添。佢最近仲試用緊新口罩，仲講笑話自己親身試用而未受感染，但原來仲有個改良版添，唔知到時係咪又要再試用呢。<br/><br/>Felix有份研發嘅口罩係可以洗60次，仲可以防菌。而佢今日(17日)所戴嘅口罩就正正係佢有份研發嘅，日前開始試用。至於用後感，佢就話比起外科口罩相對焗啲，所以最初戴嗰時仲要花成十幾分鐘適應下。佢仲話依家所戴緊嘅口罩只有防菌，改良版就會加咗層防水布料。<br/><br/>講咗咁耐，到底會幾時推出市面呢？Felix就話依家隻口罩係等緊認證，得到後就可以推出市面，而佢已經搵咗100個女工整咗逾2萬個口罩，打算得到認證後就會將首2萬個捐畀弱勢社群同埋長者，之後嘅就會推出市面，預計都要100蚊一隻。