政Whats噏:懶理無家者恐染疫 劉江華被嘲「神隱局長」

2020年04月04日 20:47
東網電視
更多新聞短片
劉江華被批懶理無家者留連街上,增加染疫機會。(設計圖片)
新冠肺炎確診數字急劇上升,有通宵營業嘅連鎖快餐店上月宣布暫停晚市堂食服務兩個星期,令部分喺快餐店過夜嘅無家者失去容身之處。多名議員上月27日去信民政事務局局長劉江華,要求緊急會面討論無家者問題,但有議員尋日(3日)就喺Facebook(Fb)貼文,佢哋等咗一個星期仍未獲回音,批評劉係「神隱局長」咁話喎。
上月底有連鎖快餐店宣布暫停晚市堂食服務兩個星期,意味原本喺餐廳過夜嘅無家者會流離失所,有說佢哋去瞓天橋底。社會福利界議員邵家臻喺措施實施當日,即上月25日去信劉江華,要求民政事務總署開放臨時庇護中心,避免佢哋留連街上,容易染疫。不過,署方喺兩日後,即上月27日回信拒絕,又重申臨時庇護中心喺現行機制下只會喺惡劣天氣下開放,仲話該署嘅政策範疇並唔包括為呢班受影響人士提供臨時居所添!
收到民政署回信後,邵大感不滿,即日聯同多名議員再去信劉江華,要求劉喺1個星期內同佢哋會面討論相關事宜。不過,邵尋日就喺Fb上貼文,大呻佢哋「等了又等」,但「1星期過去,蚊滋也沒有1隻」,更炮轟民政署同社會福利署,反問佢哋「係咪要有無家者成為傳染者、感染者才衝出來補救」?
邵又話早前透過電話確認當局收到佢哋嘅去信,但到今午(4日)仍未獲當局回應。佢仲話以前就算劉江華唔得閒,仲有副局長陳積志或其他轄下部門嘅官員回覆,但今次1個官都冇理過佢哋。邵又重提民政署喺上月27日嘅回信,批評當局處理手法官僚,「寧願佢答我話有咩難度,例如話開(臨時庇護)中心更加易爆發疫情,咁起碼仲有得拗」。
依家全球爆疫,邵指各地政府喺處理疫情期間都有協助無家者,因為佢哋染疫嘅風險高,批評港府未有援助佢哋,猶如喺防疫工作上留下漏洞。佢又大鬧負責處理無家者問題嘅部門,好似喺疫情之下選擇推卸責任咁話喎。
不過,外界亦有唔少人質詢佢哋好似喺冇疫情嘅時候,將處理無家者問題嘅責任推畀連鎖快餐店。邵就強調自己冇叫無家者去快餐店過夜,但就覺得企業要盡一定嘅社會責任,又話喺疫情之下「政府都會叫大財團減租啦」!佢又形容無家者問題係政府房屋政策失敗下嘅產物,強調政府先係真正嘅難辭其咎。