東網電視
更多新聞短片

只有約11萬香港市民追蹤林鄭Facebook。
政府喺本月初宣布未來12個月,特首林鄭月娥同問責班子自願減薪1成。根據行政長官辦公室回覆立法會嘅文件,特首今年嘅薪金將會由約521萬港元下調至約469萬港元,即係每月薪金預算由43萬4200港元減至39萬800港元。雖然特首「減薪」,但本財政年度嘅薪金預算仍高達468萬9600港元喎,只不過慳咗約52萬咋!
特首當時宣布減薪,行政會議非官守議員亦緊追其後,宣布未來12個月捐出1成薪金。本身行政會議非官守議員喺本財政年度嘅酬金總開支係1696萬港元,包括召集人陳智思在內嘅16位非官守議員減薪後,將會幫政府庫房慳返170萬港元,酬金預算亦會減至1526萬港元。
文件亦透露特首Facebook(FB)有幾多follower(追蹤者)。全港700幾萬人,得約11萬人追蹤特首個FB。而政府喺上個財政年度聘用處理特首社交平台嘅人員,薪酬開支就高達56萬港元喎。特首減薪慳52萬港元,但佢啲社交平台一年就要使56萬。其實特首有冇諗過自己減薪條數,都未足以幫自己啲社交平台「填氹」呢?