政Whats噏：民主黨搬龍門降低去留門檻　只問自己支持者

現屆立法會議員延任不少於1年，民主黨早前委託香港民意研究所(民研)進行民調決定去留，但民調「門檻」就遲遲未有定案。至今日(4日)民主黨胡志偉、林卓廷和公民黨楊岳橋等共15名議員，就宣布將門檻統一改為過半數，即只要有一半受訪者要求佢哋離開議會，就會遵從結果，有別於早前話民主派支持者超過2/3人有同一傾向就跟從，如今變相降低咗門檻，仲要訪問自己支持者應否延任，唔單止龍門任意搬，仲要封咗一半龍門，成為政界大笑話。

有關調查將於本月21日開始，預計1星期內完成，由民研及香港中文大學傳媒與民意調查中心同步進行，各自訪問1000個樣本。問題暫定3條，包括有幾支持或反對佢哋留任、有幾支持或反對佢哋離開議會、係咪佢哋嘅支持者。

民研行政總裁鍾庭耀話，日前曾提出不分受訪者政治取態，只要全港民意過半，及民主派支持者意向達2/3嘅「雙門檻」，但反覆商討後，指民主派擔心全民過半數會包括非支持者嘅人，但其實最重要係得到佢哋支持者授權，所以最終決定採用單一過半門檻，仲要只問番民主派嘅支持者，縮窄灰色地帶，減少爭議。

胡志偉話，將原本2/3門檻大幅度下降至半數門檻，係得悉有市民認為標準定得太高或別有用心，同時決定以支持者意向作決定，可讓結果不受建制派支持者干擾，強調如果過半民意認為佢哋要離任，一定會服膺於結果，如果最終兩種意見都不過半數，例如出現48比49嘅情況，就需要再作政治判斷喎。如果連咁嘅門檻都出現兩種意見相約，咁就真係走得抵喇。

最早表態唔會留任嘅人民力量陳志全（慢必）喺民調方案公布後隨即在社交網站發文，指唔評論其他議員用咩方法決定去留，亦唔識評論佢哋嘅民調方法，仲話佢哋鍾意啦，似乎有講嚟都嘥氣嘅意味。而同屬人民力量嘅譚得志（快必）亦以「矛盾的民調」為題，指「訪問支持留低嘅人，(去)支唔支持想留低嘅人留低，荒謬...何必扮理性？何必搞大辯論？」

其實到現時為止，去留門檻一直都由民主派自己設定，覺得早前方案唔啱數就即改，仲要一再降低，美其名就話門檻改為半數減少分歧，但心水清嘅都知道咁做係增大咗佢哋留低嘅機率，仲要門檻內嘅人全部都係民主派支持者，問返自己支持者支唔支持自己延任，公正性有幾高，相信市民心知肚明喇，與其做到咁肉酸，不如乾脆政治決定延任多一年算啦！