政Whats噏：與街工「割席」　兩葵青區議員取消政治聯繫

區議員同所屬政黨割席嘅浪潮持續，葵青區議員梁志成話考慮到街工財困「冇水」，加上未來政治形勢不明朗，決定取消同街工嘅政治聯繫。至於另一名葵青區議員梁靜珊都作出同樣決定，不過就冇透露更多原因喇。

兩人近日取消喺區議會網頁上所列嘅政治聯繫，梁志成向傳媒承認考慮到街工財困，話既然「冇水」，不如實實際際做返以前可以做到嘅嘢，從現實出發。另外，佢又透露街工傾向唔再參與未來嘅政治選舉，認為未來政治形勢不定，所以上月決定取消同街工嘅政治聯繫，不過都唔知自己可唔可以通過宣誓要求喎。

睇返梁靜珊嘅社交網站，佢喺上月23日前嘅貼文仍然附有街工標誌，不過之後就改為葵青區議會標誌。佢否認退黨，強調只係取消同街工嘅政治聯繫，但係唔願意透露原因。至於街工位於葵芳邨嘅辦事處已經結束營運，並改於荔枝角工廈開設辦事處同小型超市。因判刑被取消區議員資格嘅街工梁耀忠話對事件冇回應，不過據佢所知暫時未有人退黨。