政Whats噏：灣仔區會補選正副主席　建制大翻盤

今屆區議會原本係民主派主導，佔多數議席且包攬17區區議會嘅正、副主席職位。但隨住早前爆發嘅大規模辭職潮，多區出現主席或副主席空缺，民主同建制派嘅勢力出現逆轉。其中灣仔區議會前副主席麥景星於今年7月請辭之後，主席楊雪盈連同6名港島區區議員日前被指宣誓無效，遭政府取消議員資格(DQ)。灣仔區議會今日(21日)補選正副主席，同屬建制陣營嘅區議員黃宏泰以及林偉文，喺無競爭嘅情況下分別當選主席同埋副主席，而該區會現時唯一嘅民主派區議員顧國慧就稱病缺席，建制派重奪當區主導權。

正副主席選舉由灣仔民政事務專員陳天柱主持，陳指截至今日下午1時30分，只收到區議員謝偉俊提名黃宏泰出任主席，所以黃自動當選。黃宏泰跟住就提名林偉文做副主席，亦都喺無競爭下自動當選。正副主席選舉結果塵埃落定之後，黃宏泰隨即召開第14次灣仔區議會大會。

觀乎其他由建制派重奪主導權嘅區議會，都有提出重組委員會，不過黃宏泰就認為要同其他同事溝通，以及先處理過去積壓已久嘅工作，為區議會撥亂反正咁話喎。黃又指過去多年來，即使建制派內都有唔同嘅聲音，並唔係完全支持政府嘅政策，冀未來可繼續反映市民嘅聲音。黃又形容灣仔係一個和諧嘅社區，希望能夠作起頭作用，以和諧氣氛感染其他地區喎。

灣仔區議會原本有13名區議員，9名係民主派，建制派只得4人，正副主席都係由民主派議員包攬。但隨着民主派議員因宣誓或其他原因陸續辭職，甚至係被DQ，灣仔區議會現時只剩下5名區議員，分別係顧國慧、謝偉俊、林偉文、李碧儀同埋黃宏泰，當中只有顧國慧係非建制派議員，而顧亦以身體不適為由，請假缺席尋日嘅會議。

根據《區議會條例》，若區議會正、副主席懸空，需要喺懸空後首次嘅會議上互選，同時規定要有3名不同議員提名及附議，唔可以自我提名，即係至少需要4名區議員先可完成補選程序。所以，只剩下3名區議員嘅中西區及黃大仙區議會喺本月嘅大會均會延期，無法補選主席及召開會議。屯門區議會過去兩次大會都因為法定人數不足而未能開會。