東網電視
更多新聞短片
李家超(中)日前同中學生交流，仲自爆小秘密。
政務司司長李家超上任3個幾月，面對唔少挑戰，但原來當年佢入警察學堂初期，都經歷過唔少試煉，之後嘅改變甚至大到阿媽都唔認得添！究竟發生乜事呢？
李家超日前同中學生交流，傾偈時就同年輕人大爆秘密，原來佢小時候身體孱弱，但後來投考警隊，喺學堂訓練咗兩個月，又步操、又攀山，放假返到屋企，佢媽媽就話唔認得佢，「砰」一聲關埋門，仲反問佢係邊個添！佢就同媽媽講「我係你個仔啊」，佢媽媽先話「聽落把聲又似似哋喎」，先至開門畀佢咋！
由於面對面交流時間得一日，佢要將自己60幾年嘅經歷，濃縮至好短嘅時間話畀年輕人知都唔容易㗎，不過李覺得年輕人完全吸收得到，稱讚年輕人充滿活力、希望同埋能量，所以當佢退休嗰陣都可以安享晚年。
佢又鼓勵年輕人，要堅信自己有能力去應付問題，唔好低估自己嘅能力，最重要嘅係如果遇上解決唔到嘅問題，就切記要搵其他人傾訴喇！佢又指「態度決定成敗」，人生唔係一個死胡同嚟嘅，希望年輕人可以嘗試多啲唔同嘅事物啦！
