政Whats噏︰李樂詩批政府對科研資助不足 礙年輕人發展

2021年11月22日 18:24
東網電視
更多新聞短片
李樂詩(右)蘇樺偉(左)分別獲頒榮譽院士及資深院士銜。(陳嘉順攝)
政府近年積極推廣科研,更想將香港打造成地區創科樞紐,但當局對科研出手似乎唔夠「闊綽」,科研發展長年落後於鄰近地區,更惹嚟極地女探險家李樂詩批評。李直指政府喺科研投放嘅資源唔夠,要求提交嘅科研報告又繁複,本港亦都無合適嘅科研課程,搞到人才流失,成個科研環境都要「大執」。不過,佢都鼓勵年輕人要繼續努力,趁後生同有體能去追求科研夢!
作為全球第一位踏遍三極嘅女探險家李樂詩博士,今日(22日)獲社會企業研究院頒授榮譽院士,佢憶述自己20幾年前自費去考察,當時係跟隨中國科學家嘅腳步,形容嗰時「做咗考察先再算」,等政府嘅資助已經太遲。佢仲話當時考察後發現氣候問題嚴重,見到雪崩都好驚心動魄,覺得呢個課題都好重要,決心返香港同公眾發表相關資訊。
講起科研支援方面,佢就話中國政府依家喺科研發展上不遺餘力,因為中國需要預示到未來嘅發展,而外國亦都有設立科研基金;相反香港依家對科研資助仲有不足,佢透露只有慈善機構肯贊助學生去考察。佢仲話科研係一個持續過程,好多時要實地考察,而且唔喺只喺去一次,但每次問政府拎資助時都要寫報告,好多嘢要解釋,佢就唔係幾識寫喇!
佢又講到好多時學生去完考察想繼續進修,但礙於香港嘅出路比較窄,學生都只能選擇去外國讀。佢期望下一代繼續投身科研行業,同向政府爭取相關資助,佢強調要做到科研科技探險3位一體,令年輕人有更多元嘅發展渠道,香港唔係得金融行業等發展路數。
唔單止關心年輕人發展,佢都好關注環境問題。佢話依家地球生態環境每況愈下,尤其全球爆發咗大疫情之後,社會用多咗即棄產品,對環境帶嚟好大污染,希望大家抗疫時唔好唔記得保護環境。
至於曾喺殘奧六奪金牌,並5次打破世界記錄嘅田徑運動員嘅「神奇小子」蘇樺偉,今日亦獲頒資深院士。佢對於獲獎感到好自豪,又笑言近排以佢做原型嘅電影好賣得,希望電影帶畀各界更多正能量,用自己嘅經歷去鼓勵同感動香港人。
蘇媽就話運動員喺黃金時間為港爭光,就算佢哋有無拎牌,都為咗香港付出好多,雖然政府對運動員嘅支援比以前好咗好多,但始終喺退役工作安排及退休金上都未有做好,指兒子「跑咗21年都無退休金」,又話兒子依家喺香港殘奧會工作,但「唔係個個好似佢咁幸運」,呼籲政府比多啲資源運動員,尊重佢哋嘅付出同汗水。