政Whats噏：譚得志劉嘉鴻等37黨員退出人力　形容棄之不可惜

自舊年《港區國安法》實施後，唔少政黨都爆退黨及解散潮，其中人民力量(人力)近日就爆出更換法定幹事風波。該黨代主席梁家聲，被指企圖擅自推舉一名非會員成為法定幹事，引起至少38名黨員不滿並宣布退黨，包括前主席劉嘉鴻、前執行委員蔡中平、前副主席錢寶芬、譚得志(快必)同埋陳志全(慢必)前助理蘇浩，即時生效。劉嘉鴻指事情已經變質，所以「棄之亦不可惜」。

其實人力主席陳志全(慢必)同埋副主席譚得志(快必)，分別因民主派35+初選及發表煽動文字被還押，今年5月慢必宣布辭去主席及退黨，其後獲准保釋候訊。估唔到事隔幾個月，黨內爆出退黨風波。劉嘉鴻尋晚(13日)喺Facebook宣布，響應該黨執行委員蔡中平嘅呼籲，自己同埋另外36位黨員退出人民力量，退黨嘅決定已經通知有關職員，刪除佢哋嘅會員記錄。佢指人力成立10年，經歷多番波折，喺大環境嘅轉變下，已難有作為。佢認為政治組織從來都只係工具，爭取公義平等先至係目的，會籍身份根本無必要，亦都唔應該眷戀。

然而，佢又話人非草木，點都有感情嘅，即使件工具暫時發揮唔到功用，只要狀況良好，都值得保存嘅，呢個都係佢之前一直留任會員嘅原因，但事情現已變質，覺得留守亦無必要，棄之亦不可惜。

劉提到嘅事情變質，相信係早前該黨副主席錢寶芬離任，而該黨代主席梁家聲涉擅自更改社團幹事，更透露人選將會係非人力成員。因此蔡中平前晚亦都發文炮轟梁嘅手法極不光彩，質疑梁有計劃地打算竊取整個組織，愧對「人民力量」4個字，認為咁嘅組織唔應該繼續存在，佢亦都以執行委員名義指示相關管理人員停止所有人力社交媒體運作，並辭去執委一職，同時呼籲持相同理念嘅黨友一齊退黨。

劉回覆指，人力本來有大約50多名會員，計落今次至少有38人退黨，只係淨返10多人左右。至於人力會唔會解散，劉就話自己都退咗黨，就唔太清楚喇。不過佢重申，人力將來嘅掌權人已經違背咗人力本身嘅理念，唔再係佢熟悉嘅人力喇，所以一定要退黨同人力劃清界線咁話喎。