政Whats噏：民主黨擬革走梁翊婷　凍結李華明黨藉半年

民主黨副主席梁翊婷、黨員蘇逸恒同「元老」李華明，去年喺未經黨批准嘅情況下，以個人名義支持黨外嘅立法會換屆選舉候選人，而遭到其他黨員向紀律委員會投訴。民主黨今晚（19日）舉行中委會，決定採納紀委員會嘅建議，在下月中旬嘅中委會審理革除梁翊婷、蘇逸恒黨籍，而李華明則凍結黨籍半年，但有7日上訴期限。<br/><br/>民主黨中委會今晚開會，據悉，會議上中委會在程序上採納咗紀委會報告，提出革除梁翊婷及蘇逸恒黨籍，該黨主席示意下次會議先至處理。<br/><br/>紀委會亦提出凍結李華明黨籍半年，但容許李華明有7日時間提出上訴。據悉，梁、蘇兩人嘅上訴期已經完結，佢哋亦冇出席先前嘅相關聆訊。梁回覆傳媒查詢時話無補充。<br/><br/>民主黨喺立法會選舉前向有意申請該黨人士個人名義支持的立法會候選人，發出問卷調查，以決定是否批准黨員表態，最終只有荃灣區前區議會副主席李洪波獲批准表態支持劉卓裕。而梁翊婷、蘇逸恒在未經批准下，以個人身份支持潘焯鴻，而李華明以社工身份支持社福界候選人狄志遠。