政Whats噏：何啟明留WhatsApp幫手請照顧員　第二日收過千查詢

早前社交平台流傳一段來自勞工及福利局副局長何啟明嘅錄音，指有機構需要急聘300名本地護理員，月薪介乎3.8萬港元至4.7萬港元，可提供入職培訓，而且沒有門檻，呼籲有意者聯絡。而最新何啟明就直接喺Facebook貼出社會福利署聘請本地照顧員嘅廣告，並附上佢個人聯絡方法，何指出廣告第二日就已經收過千查詢啦！<br/><br/>社署以月薪31,150港元聘請本地照顧員，合約期3個月。何呼籲網友轉介，名額招滿即止，仲附上自己個人Whatsapp連結作聯絡。何啟明接受查詢時就表示，話都唔係第一次，留自己嘅號碼，可以親自回覆更好，佢又指短短兩日就已經收到過千幾個查詢，但最後幾多人成功錄取就唔知啦！<br/><br/>至於有冇收到啲咩古怪查詢，何就話有唔少人都唔識開PDF申請表格，實在頭痛。喺網上公開自己手機號碼，又會否擔心收到騷擾電話？何指以前做區議員時都係咁做，話唔洗咁緊張，通常未知來電都會飛走，所以唔擔心咁話。<br/><br/>不過，日前何嘅Whatsapp就因為收得過多信息出現故障，一度被禁止使用，要聯絡客戶服務才解決到問題，今次短時間內大批查詢，又會否出現故障呢？何笑言都只有做住先，無計㗎，呢一刻暫時無問題，唔擔保之後會唔會又故障啦。