政Whats噏：財委會或加開特別會議　討論公務員調薪撥款申請

公務員調薪事件繼續發酵。無論4大或4小工會都希望能夠提高加幅，預料下周二行政會議就加幅拍板。被問及幾時審議加薪撥款申請，立法會財務委員會主席陳健波話原本最後會期係下周五(15日)，但如果需要審議公務員調薪，會加開特別會議，可能喺本月22日召開。<br/><br/>睇返下周五財委會嘅議程，確實好爆，事關有成17項撥款同開位申請。雖則係咁，但係要快起上嚟都冇話唔得，好似今日咁通過咗5項議程，由於委員會唔建議財委會進一步討論，所以會議僅進行表決，全程約10分鐘。仲記得今年3月下旬，財委會破紀錄以7分鐘火速審議完兩個項目。<br/><br/>多個公務員團體日前會晤公務員事務局局長楊何蓓茵，表達對加薪幅度感到失望，仲揚言要約見特首李家超。而4小公務員工會亦都想提高加薪幅度，及後選擇各自發聲明表達不滿。有傳楊何蓓茵尋日(7日)致電4大工會，解釋劃一加幅2.5%嘅決定，但啲工會暫時冇表態。