政Whats噏：蕭偉強重返政總　諗起昔日搏殺到天昏地暗

離開咗熱廚房5年多，勞工及福利局前局長蕭偉強今日(8日)重返添馬政府總部喎。不過，係政總大樓樓下嗰間社企餐廳啫！<br/><br/>蕭偉強鍾意周圍搵好嘢食，今日佢就搵到返添馬。佢喺社交平台貼文，話今日下晝兩點半，喺過往返工周不時打躉嘅餐廳，揀咗戶外嘅座位食個慢活午餐，形容喺秋日下午Hea食放空。由於無官一身輕，又唔使趕頭趕命做嘢，一時興之所至，吟起北宋文學家王安石嘅七言絕句「細數落花因坐久，緩尋芳草得歸遲」以表達閒適心情，話此刻別有一番滋味喎。之但係，佢多年嘅官場生涯畢竟就喺添馬度過，不禁憶起昔日喺上面(政總)返工搏殺到天昏地暗嘅日子。<br/><br/>點解會去添馬？原來佢係去攞月餅。事關佢嘅舊同事炮製自家月餅，形容係蓮蓉香、蛋黃流晒油嘅，佢搶住舉手只係分到4個。