政Whats噏：民主黨集思會商討去向　羅健熙或留任主席

曾經係泛民主派龍頭嘅民主黨，目前陷財困兼人才凋零嘅局面，前途去向未明。該黨主席羅健熙今日（14日）就表示，黨內有傾過相關問題，包括將循現有制度參選區議會，而佢本人願意繼續留任主席一職，至不過黨友係咪力撐呢，就屬未知之數喇！<br/><br/>羅指區議會無改變需要，政府要欣賞同尊重制度，容納唔同嘅政治光譜，而區議會以民主為基礎，對市民表達意見好重要，因此如果下屆沿用現有制度一定參選，但由於太多變數同可能性，好難給其實際定論。<br/><br/>之不過，想繼續發展都有一定困難，事關羅健熙涉及2019年理大事件非法集結案，案件本月開審，或有機會入獄。雖然佢表明「願意繼續去頂住呢個位（主席）」，但如果判好長時間就唔會考慮，仲笑言唔知黨友會唔會支持佢，指呢個問題比較難答，要問番佢哋本人，惟有自己可以做嘅地方盡力去做。至於民主黨會唔會解散，羅坦言唔係黨入面討論嘅事情，黨嘅好壞留待社會去評價。