政Whats噏：許德亮入工聯會　曾為民主派成員

油尖旺區議員、昔日曾屬於泛民一份子嘅許德亮加入建制陣營工聯會。議員梁文廣前日(8日)喺社交平台貼文同上載相片，分享許德亮地區辦事處開幕，而兩人背後嘅招牌清楚顯示，許已經投身工聯會。梁形容許加入工聯會係強強聯手，相信可以深化地區工作。<br/><br/>2003年，許德亮加入泛民政黨之一嘅民協，並於同年當選區議員，但去到2007年區議會換屆選舉，競逐連任嘅許德亮不但棄用該黨名義，更倒戈支持建制派人士，結果許被終止黨籍，許跟住就自稱獨立建制派，但仍然同非建制派有交情，譬如2016年立法會選舉，許曾簽署同意書支持狄志遠參選。<br/><br/>直到近日，許德亮獲工聯會邀請而加入，從而結束十多年「獨立」嘅身份，而佢喺油尖旺區議會中嘅所屬政治聯繫都已更改。