政Whats噏 : 重遇葵青舊相識　梁子穎同故交團聚

有緣千里能相會，即使各奔前程，都有機會再度聚首。議員梁子穎今日(13日)喺社交平台上載咗張合照，話自己今日同人「團聚」喎，究竟佢係遇見邊個舊相識，要專登開貼文同大家分享呢？

答案係環境保護署副署長鄭健、同環境及生態局政治助理李世隆；而前者過去係葵青民政事務專員、後者就係葵青區前區議員。過往喺葵青區一所中學做教師，後來又喺該區擔任區議員嘅梁子穎，今日以立法會議員嘅身份參觀屯門T-Park同Y-Park，結果就同鄭、李兩位故交不期而遇。既然大家都係葵青區出身，咁有緣重遇當然要影番張合照留為記念啦。

梁子穎今次嘅到訪，係實地了解廢物處理及資源回收設施，佢同鄭、李兩人嘅話題，自然離不開環保。梁子穎認為「青山綠水」就等如「金山銀山」。呼籲市民精明購物，盡量減少資源消耗，既慳錢又環保。同埋要做到再用、重用、再造，以及分類回收，先至可以有清潔美麗嘅香港。