政Whats噏：被問免針紙風波角色　江玉歡：件事已過去多提冇用

喺免針紙風波當中嘅重要角色，必定有選委會界別議員江玉歡在內，由於政府宣布2萬張免針紙無效，喺社交平台貼文批評政府做法專橫，並反問「如今是誰壞了法治？」，後來演變成同另一議員隔空駁火，到咗今日(25日)政府決定修例，對於之前發生嘅事，佢都唔想重提，只係一再重申市民需要有渠道反映憂慮。<br/><br/>江玉歡接受電台節目訪問時，被問及喺事件中嘅角色，佢話件事已經過去，多提都冇用，又話打從前朝政府，都寫過好多信畀政府反映市民意見，而唔係喺社交平台貼文喺咁鬧政府，喺批評政府對免針紙嘅做法之前一個禮拜，佢係不停咁提醒，亦有去信政府，最重要係市民覺得有怨無路訴，佢係幫市民反映，自問已盡咗做議員嘅責任。<br/><br/>對於疫苗通行證再延長半年，佢話收到好多家長投訴，話子女參加唔到課外活動，再延長就對佢哋影響更大，呼籲政府要平衡做法，同埋聽取市民意見。佢又質疑依家仲有邊啲國家會用疫苗通行證，又有邊啲國家嘅疫苗通行證會用咁長時間，希望政府多向市民解釋。