政Whats噏：網傳張秀賢話可搭路見面　葉劉：同佢唔係好熟

近來網上有傳前元朗區議會、前香港中文大學學生會會長張秀賢周圍問人借錢後唔還，張秀賢回覆東網查詢時話「要睇睇先」、「有啲可能唔係真」，而踢爆此事嘅香港財經專欄作者渾水就話近排張會胡亂吹噓能夠搭路見議員葉劉淑儀（葉劉），葉劉今日（26日）出席活動時就話「我同佢唔係真係好熟」、淨係見過張秀賢兩次左右，對其個人事務唔清楚。

葉劉今日出席其政黨提交財政預算案建議嘅記者招待會，開始前有記者查詢關於張秀賢借錢唔還嘅事，葉劉聽罷面露難色、搖頭嘆息，強調其實同張秀賢「唔係真係好熟」，淨係見過張秀賢兩次左右，對其個人事務唔清楚。

其實計同葉劉熟嘅話，渾水應該勝於張秀賢多多聲，事緣2019年，嗰時葉劉同渾水就已經見過面，渾水就讚葉劉係建制派入面唯一一個願意接觸年輕人嘅議員，仲曾經公開喺節目上贈送小菊花畀葉劉添！而葉劉都送返本雜誌回禮。原來佢哋咁熟，唔怪得之渾水睇到張秀賢話可以搭路葉劉，都用嬲嬲表情示意啦！