东网电视
更多新闻短片
麦美娟趁空档返去以前服务嘅社区。
1/2
新一届政府上任差不多一年，但睇嚟市民对众多局长嘅印象未系好深刻。好似民政及青年事务局局长麦美娟(Alice)咁，落去佢以前服务过嘅社区，班街坊仍然系叫佢“麦议员”。
Alice喺社交平台贴文，话今日(27日)趁有空档返去熟悉嘅社区，仲去到区内老字号茶餐厅买至爱嘅椰丝奶油包做午餐。咁啱路过巴士站，候车嘅乘客同佢打招呼：“麦议员，你买嘢呀？”再行前又有个街坊：“麦小姐，记唔记得我住安荫邨呀？”
行到茶餐厅买面包时，茶餐厅老板问：“你今日放假呀？”当佢买完面包转身走嘅时候，有个婆婆路过话：“喂麦美娟喎，你做咩食面包唔食饭呀，几忙都正经食餐饭啦！”之后当Alice上车时，就带咗一大袋面包、糯米糍嘞！仲有，佢话系满满嘅街坊情，社区情。
之但系，冇街坊叫Alice做麦局长喎。可能佢都察觉呢点，喺贴文最后嗰段话“无论街坊称呼我麦议员、麦小姐、麦美娟、麦局长，其实都系一句啫，我仍是我，最紧要‘帮到你’！”又真系好难讲嘅，佢做过葵青委任区议员、直选区议员同立法会新界西直选议员，做过咁耐地区工作，班街坊可能一时改唔到口都唔奇。
买咗佢至爱嘅椰丝奶油包做午餐。
