东网电视
更多新闻短片
长沙湾海滨长廊今日开放。
1/4
政府话要发展海滨长廊，但系有好嘅地方竟然唔讲畀市民听？话说深水埗区首条海滨长廊--长沙湾海滨长廊今日(30)开放，区议员袁海文话收到消息之后，立即去开Live介绍下喎，仲话唔明白点解政府唔公布长廊启用，要咁低调？
海滨长廊嘅入口喺海盈邨对面，去到长沙湾副食品市场附近。话就话系海滨长廊，但就被嘲为“海滨短廊”。点解？事关呢条长廊全程只得280米。袁海文都话同尖沙咀、荃湾海滨长廊比较，简直系蚊髀同牛髀。
虽然系短廊，但同长廊同样享有无敌海景，亦都面对同一个问题。袁海文话有啲街坊担心夏天会有臭味，但佢嘅助理就话都有啲臭味，但可以接受，仲话比起荃湾海滨长廊已经好好多。咁袁海文嘅亲身感受又系点，佢话初初嚟到闻到有啲臭味，但耐咗就唔觉有乜嘢特别。
袁海文话长廊对开海面仍然见到好多船，附近有船坞，亦泊咗啲小轮，应该系维修嘅。佢话呢区过往文康设施不足，而海滨长廊亦有休憩空间，种有花草，亦有挡雨上盖嘅木櫈，市民可以坐下望海，都好舒服吓。
仲有，现场见到一个围封咗嘅位，袁海文话呢个算系通风位，系将啲海风带入长沙湾内陆嘅。佢又话长沙湾海滨长廊分两段，分别由康乐文化事务署同酒店负责管理，将来管理上嘅协调有冇问题系值得关注嘅事。
之但系，点解政府唔公布呢？佢都话谂唔明，听到海滨长廊会喺今日开放真系意想不到。佢话唔明政府点解要咁低调，仲话开幕其实可以搞得隆重啲。
袁海文话初时觉得有啲臭味，耐咗就冇乜特别。
休憩区有木櫈畀市民坐。
海滨长廊由头至尾只得280米。
