港澳版>新聞>中港台
  • 政Whats噏:保險拒賠 陳健波拆解原因

    新聞觀看次數:15.5k
    香港時間
    2023年09月03日(日) 21:38
    東網電視
    更多新聞短片
    陳健波一再強調,轉地址時務必通知保險公司。
    司機或車主一旦改地址,唔單止要通知運輸署,亦必須知會保險公司。保險界議員陳健波(波哥)嘅辦事處早前遇到一宗求助個案,有一位女士因一宗交通意外,而被涉事車主追討6位數嘅賠償金額。儘管求助人已購買相關保險,但保險公司拒賠,究竟係乜嘢原因呢?
    話說求助人曾喺駕駛期間同一輛電單車發生碰撞,已即時報案同驗傷,事後亦有通知保險公司。後來求助人喺庭上承認不小心駕駛,以為事件告一段落,於是無再向保險公司報告,誰知一年後竟收到涉事事主向佢追討意外所引致嘅賠償,金額高達十幾萬港元,但求助人所投保嘅保險公司就拒賠。
    點解?原來求助人期間曾搬過屋,收唔到保險公司向佢寄遞有關意外嘅文件。至於解決辦法,係建議求助人向保險公司提供搬遷證明,解釋自己並非存心瞞報,希望保險公司可以重新考慮。最後雙方達成共識,求助人只係支付一筆特定金額,餘數由保險公司承擔。
    波哥一再強調,轉地址時務必通知保險公司,以免錯過任何重要文件。再者,若收到任何部門發出有關索償嘅資料,都要立即轉交保險公司處理。佢話無論財物損失抑或任何偒亡,尤其係涉及第三者,只要同保險有關,即使達成和解,事後都要通知保險公司以及辦理相關手續,因為追索期係可以以年計。
    感謝您瀏覽東網。請按入詳細閱讀本網站所載之使用條款及細則私隱政策聲明,並須確定您同意接受有關條款及聲明的約束才可繼續瀏覽。