政Whats噏：牛仔節撐場　陳祖恒撞到邊個咁開心

呢排時裝業界都好多活動，好似日前就有個「香港牛仔節」喺中環街市搞咗開幕禮，紡織及製衣議員陳祖恒(Sunny)當然有去撐場喇！仲畀佢遇到時裝界名人添！

邊個？咪就係享譽全球嘅時裝設計師譚燕玉(Vivienne Tam)囉！見到佢哋嘅合照，雖然Sunny笑得比Vivienne Tam含蓄，但仍然反映到雙方都好開心嘅。機會難得，Sunny當然捉住Vivienne Tam 交流下時裝潮流嘅走勢。

其實呢個牛仔節已經係第3屆舉行，係由「創意香港」贊助、職業訓練局轄下香港知專設計學院（HKDI）舉辦嘅。Sunny話今屆牛仔節係以「牛仔新勢力：促進全球牛仔文化交流與合作」為主題，當中嘅展覽同市集既為牛仔品牌提供展示產品嘅平台，亦有由HKDI學生親自設計的牛仔時尚產品。

依家環保已經潮流，Sunny話唔少品牌亦運用咗唔少可持續同綠色技術，例如有品牌運用廢棄的紡織物料同舊衫褲，改造成新嘅服裝，亦有品牌用咗植物印染等綠色技術，體現行業與時並進、綠色可持續嘅一面喎。